Senat depýtattary Bıbigúl Jeksenbaı men Darhan Qydyráli Ulttyq arhıv qyzmetkerlerimen júzdesip, «Jańa Konstıtýsııa jobasy: negizgi baǵyttar jáne qoǵamdaǵy róli» taqyrybyn talqylady. Kezdesý mazmuny el damýynyń jańa kezeńine jol ashatyn qujattyń mánin tereń túsindirýge arnaldy, dep jazady Egemen.kz
Jıynda senatorlar jańa Konstıtýsııa jobasynyń memlekettigimizdi nyǵaıtyp, basqarý júıesin jańǵyrtýdaǵy strategııalyq salmaǵyna toqtaldy. Qujat qoǵam suranysyna jaýap beretin, quqyqtyq keńistikti zaman talabyna saı túzeıtin baǵyttardy qamtıtyny aıtyldy.
Senator Bıbigúl Jeksenbaı jańa Ata zań jobasynyń qoǵamdyq mańyzyn aıqyndaı kele, onyń tek quqyqtyq qujat emes, azamattar men bılik arasyndaǵy jańa qoǵamdyq kelisimniń kórinisi ekenin aıtty.
«Bul reforma azamattardyń quqyqtary men bostandyqtaryn keńeıtip, memlekettik basqarý júıesin zamanaýı standarttarǵa saı jetildirýge baǵyttalǵan. Derbes derekterdiń qaýipsizdigi, adamnyń jeke ómirin qorǵaý, balalar men qoǵamdy zııandy aqparattan saqtaý – jańa Konstıtýsııa jobasynyń negizgi qaǵıdattary. Bul normalar árbir azamattyń kúndelikti ómirine, qundylyqtaryna tikeleı áser etedi. Referendým – ár azamatqa óz tańdaýyn jasap, tarıhı úderisterge tikeleı qatysý múmkindigi. Sizdiń daýysyńyz – jańa Ata zańnyń qalyptasýyna jáne elimizdiń bolashaǵyna yqpal etedi. Al arhıv qyzmetkerleri – tarıhı qujattardy saqtaýshylar ǵana emes, eldiń rýhanı jadyna jaýapty, osy tarıhı kezeńniń mánin tereń túsinetin qaýym», dedi ol.
Elimizdiń sportshylary men óner ıeleri jańa Konstıtýsııa jobasyn qoldady
О́z sózinde senator Darhan Qydyráli arhıv salasynyń reformalardaǵy ornyn atap ótti.
«Sizderdiń eńbekterińiz jańa zań jobasynyń iske asýyna tikeleı úles qosady. Muraǵat isin sıfrlandyrý, derekter qoryn damytý, materıaldyq-tehnıkalyq bazany nyǵaıtý, arhıv qujattaryn saqtaýmen qatar, olardyń qaýipsiz ári qoljetimdi bolýyn qamtamasyz etý – bul reformanyń naqty jáne mańyzdy baǵyttarynyń biri», dedi ol.
Aqsý jastary oblys ákimimen jańa Konstıtýsııa jobasyn talqylady
Kezdesý sońynda senatorlar 15 naýryzda ótetin respýblıkalyq referendýmnyń el taǵdyry úshin máni zor ekenin aıtyp, arhıv ujymyn jáne barsha azamatty mańyzdy saıası naýqanǵa belsendi qatysýǵa úndedi.
Referendým jáne jańa Konstıtýsııa: Halyq kóp jınalatyn oryndarda aqparattyq jumys jandandy